நான் சொறிந்து காயப்பட்ட நீயும் நானும்

வகுப்பறையில் உன்னை நான் சொறிந்துவிட்டேன்
நீ அழுது கொண்டிருந்தாய்
உன் விழி வழியே ஒரு கங்கையை ஓடவிட்டிருந்தாய்
உன் உடையில் படிந்திருந்த
அழுக்குப் பற்றிப் பேசினேன்
அவை வாழைக் கசறு
தலையில் தடவும் எண்ணைய்
எனவும் கண்டேன்
அதைப் பற்றிப்பேசினேன்
அறிவுரைத்தேன்
உன் நகத்தில் தேங்கிய ஊத்தை பற்றியும்
உன் பாடப் புத்தகங்களின் கிழிசல்களையும்
வினவியபோதே
எனக்குள் நான் பயங்கரமாகப் படிந்தேன்
நீ அழுது கொண்டிருந்தாய்
என்னிடம் நெருங்கிப்பேச தவறி நின்றாய்
வாப்பாவின் மறு திருமணமும்
உம்மாவின் தனிமையும்
உன் கண்ணீருக்குள் நீந்தியபோதே
நானும் உன்போல் காயப்பட்டுவிட்டேன்.